Müəllim Hörmətinin Olmadığı Yerdə Heç Kəsin Hörməti Olmayacaq
Cəmiyyətin gələcəyini formalaşdıran əsas sütunlardan biri müəllimdir. Çünki müəllim yalnız dərs deyən, bilik ötürən bir şəxs deyil. O, insan yetişdirən, şəxsiyyət formalaşdıran, bir millətin mədəniyyətini, mənəviyyatını və gələcəyini qoruyub saxlayan bir dirəkdir. Müəllimin hörməti sarsıldığı anda isə cəmiyyətin bütün dayaqları sarsılır.
Müəllim – Millətin Güzgüsü
Tarix boyu bütün böyük dövlətlərin inkişafında müəllimlərin xüsusi rolu olub. Dünyanın ən müasir ölkələrində müəllim peşəsi ən yüksək dəyərə malikdir. Onlar yalnız təhsil ocaqlarında deyil, həm də ictimai həyatda nüfuz sahibidirlər. Çünki hər bir həkim, mühəndis, alim, siyasətçi və hətta dövlət başçısı da bir zamanlar müəllimin sinfindən keçib.
Əgər müəllimə hörmət göstərilməzsə, gələcəkdə bu peşənin nüfuzu azalar, gənclər müəllim olmağı seçməz, nəticədə isə cəmiyyətin mənəvi dayaqları qırılar. Belə olan halda isə heç bir peşənin, heç bir insanın hörməti qala bilməz.
Hörmətin Aşağılanması – Gələcəyin İtkisi
Bugünkü dünyada maddiyyat çox zaman mənəviyyatı üstələyir. Tez-tez rast gəlinir ki, müəllimin zəhməti layiqincə qiymətləndirilmir, onun maaşı cəmiyyətin sosial-iqtisadi tələblərinə cavab vermir, hətta məktəbdə öz şagirdindən, valideynlərdən hörmətsizlik görür. Bu isə çox təhlükəli tendensiyadır.
Müəllim hörmət görmədiyi bir mühitdə şagirdlər də öyrənməyin dəyərini anlamaz. Həmin şagirdlər böyüyəndə də nə böyüyə, nə elmə, nə də dövlətə hörmətlə yanaşar. Bu, təkcə bir müəllimin deyil, bütöv bir millətin gələcəyinin itkisi deməkdir.
Valideyn və Cəmiyyətin Məsuliyyəti
Müəllimə hörmət yalnız dövlətin verdiyi maaşla ölçülməməlidir. Ən böyük hörmət ailədən başlayır. Valideyn övladına müəllimi sevməyi, ona ehtiram göstərməyi öyrətməlidir. Çünki şagirdin müəllimə yanaşması birbaşa valideynin münasibətindən doğur. Əgər valideyn müəllimi kiçildərsə, övlad da eyni addımı atacaq.
Cəmiyyət də bu məsələdə məsuliyyət daşıyır. Televiziya, media, ictimaiyyət müəllimin obrazını daim ucaldan nümunələr təqdim etməlidir. Müəllim hər zaman cəmiyyətin güzgüsü kimi göstərilməlidir.
Nəticə
Müəllim hörmətinin olmadığı bir yerdə heç kəsin hörməti olmayacaq. Çünki müəllim yalnız bir peşə sahibi deyil, gələcəyin memarıdır. Onu ucaldan millət yüksələcək, onu kiçildən isə zamanla özünün də hörmətini itirəcək.
Cəmiyyətin sağlamlığı, dövlətin gücü, millətin kimliyi müəllimə göstərilən hörmətdən keçir. Müəllimə dəyər vermək – öz gələcəyimizə dəyər verməkdir.
Araşdırmaçı jurnalist Arzu Abbasova