Maduro işi: Beynəlxalq ittihamlar və ABŞ-Venesuela münasibətlərində hüquqi gərginlik
ABŞ-nin Venesuelaya qarşı əməliyyatlarından sonra ölkənin keçmiş prezidenti Nicolas Maduro və həyat yoldaşı Cilia Flores Nyu-Yorka aparılaraq məhkəmə qarşısına çıxarılıb. Zafertv.az bu barədə “BBC News”a istinadən xəbər verir.
Maduro “narkotik və silah qaçaqmalçılığı” ilə bağlı ciddi ittihamlarla üz-üzədir.
Məhkəmə binası qarşısında həm tərəfdarların, həm də əleyhdarların şüarlar səsləndirdiyi, polisin isə tərəfləri bir-birindən ayırdığı bildirilir.
Martın 26-da keçirilən iclasda prokurorlar iddia ediblər ki, Maduro Venesuelanın sərvətlərini “talayıb” və bu vəsaitləri hüquqi müdafiə xərclərinə yönəltməməlidir. Müdafiə tərəfi isə onun öz müdafiəsini maliyyələşdirmək hüququnun olduğunu bildirib.
Hakim işin “adi çərçivələri aşdığını” və çoxlu resurs tələb etdiyini qeyd etsə də, bu əsasla işin bağlanmayacağını bildirib. Eyni zamanda, növbəti məhkəmə iclasının tarixi hələ müəyyən edilməyib. Müdafiə tərəfi isə ya işin tam dayandırılmasını, ya da sübutların ayrıca araşdırılacağı xüsusi dinləmənin keçirilməsini tələb edir.
Maduro və Flores yanvar ayında Karakasdakı iqamətgahlarına edilən gecə reydi zamanı ABŞ qüvvələri tərəfindən saxlanılıb. Onlar ittihamları rədd edir və əvvəlki məhkəmə iclasında hakimə “qaçırıldıqlarını” bildiriblər.
Prokurorluq müdafiə tərəfinin sübutları hələ saxlanılmamış digər şübhəlilərlə paylaşmasının qarşısını almağa çalışır. Bu şəxslər arasında Maduronun oğlu və hazırda vəzifədə olan bir venesuelalı nazir də var. Prokurorların fikrincə, belə bir vəziyyət şahidlərin təhlükəsizliyini riskə ata və sübutların məhv edilməsinə səbəb ola bilər.
İttihamlara görə, Maduro 1999-cu ildən etibarən ailə üzvləri və tərəfdaşları ilə birlikdə kokain qaçaqmalçılığı şəbəkəsində iştirak edib və ABŞ tərəfindən “terror təşkilatı” kimi tanınan kartellərlə əməkdaşlıq edib. Ona qarşı narkotik əsaslı sui-qəsd, ABŞ-yə kokain daşınması və bu fəaliyyətlər üçün qeyri-qanuni silahların istifadəsi kimi ittihamlar irəli sürülüb.
Prokurorlar iddia edir ki, Maduro prezident olmazdan əvvəl qaçaqmalçılara pasport verilməsinə şərait yaradıb və narkotik gəlirlərinin daşınmasında istifadə olunan uçuşlara diplomatik qoruma təmin edib. 2013-cü ildən sonra isə bu fəaliyyətlərin şəxsi və yaxın çevrəsinin maraqları üçün genişlənməsinə göz yumduğu bildirilir.
Maduro və həyat yoldaşı bütün ittihamları rədd edərək günahsız olduqlarını bildiriblər.
Hazırda Maduro Nyu-Yorkun Bruklin bölgəsində yerləşən Metropolitan Detention Center həbsxanasında saxlanılır. O, yüksək təhlükəsizlikli xüsusi rejimdə – xarici dünya ilə əlaqələrin ciddi məhdudlaşdırıldığı şəraitdə tutulur. Bu çərçivədə ona yalnız vəkilləri ilə görüşmək, duş qəbul etmək və nəzarət altında məhdud fiziki fəaliyyət üçün kameradan çıxmağa icazə verilir.